نهى لطفى ماشية بالعكس !

كمال سلطان الأحد 17 فبراير 2008, 3:15 pm

نهي لطفي .. مش ماشية بالعكس !

أول حاجة عرفتها "نهي لطفي" في حياتها انها تفرح قوي لما تعمل حاجة كويسة وتحاول تشجع نفسها علشان كل الحاجات اللي تقرر انها تعملها تبقي زي الكتاب ما بيقول.. باختصار "نهي" عرفت معني انها تعتمد علي نفسها من وقت ما كانت طفلة صغيرة.. حبت الفن واتعلقت بيه زي ما الأطفال بتتعلق بالشيكولاته ومدينة الملاهي وقناة أفلام الكارتون.. قررت "نهي" انها تدخل الطريق الصعب بس كانت مصممة انها تستحمل كل حاجة لحد ما توصل لنقطة تاخد نفسها وتخليها تقف وتشوف ها تكمل ولا لأ.. فعلا "نهي" وصلت لمنطقة أمان بعد ما قررت تثبت نفسها وتتعلم كويس وتفهم وتركز وتنال اعجاب كل الأساتذة اللي ساعدوها وعلموها.. "نهي" واحدة من أهم خريجات مركز الابداع الفني بالأوبرا وعملت أكثر من عرض متميز علي مسرح المركز وكمان بدأت تاخد طريقها في الاحتراف والعمل في الأفلام والمسلسلات.. وقفت "نهي" علي المسرح القومي مؤخرا بطلة للعرض المتميز "الاسكافي ملكاً" مع المخرج اللي بتحبه ومديونة له بالكثير "خالد جلال" وبعدها دخلت بلاتوه السينما علشان تصور فيلم شبابي جديد اسمه "ماشيين بالعكس".. "نهي" عارفة انها مش ماشية بالعكس في حياتها وان طريقها بالصبر والتعب هايبقي طريق مفروش بالورد.. انتظروا "نهي لطفي" سندريلا جديدة علي الشاشة الفضية قريباً جداً.

نقلا عن مجلة حريتى